TUWAINUE WABUNIFU WAZAWA KUWANADI KIMATAIFA - DKT. BITEKO

Na Ofisi ya Naibu Waziri Mkuu na Waziri wa Nishati

Naibu Waziri Mkuu na Waziri wa Nishati, Mhe. Dkt. Doto Biteko amesema kuwa pamoja na jitihada za kuwainua wabunifu wawekezaji nchini, bado kuna umuhimu mkubwa wa kuwawezesha wabunifu wetu kukua zaidi ndani na nje ya mipaka ya nchi.

Dkt. Biteko amesema hayo leo Desemba 16, 2024 Jijini Dar es Salaam alipomwakilisha Rais wa Jamhuri ya Muungano wa Tanzania, Mhe. Dkt. Samia Suluhu Hassan kufungua Kongamano la Uwekezaji wa Kampuni Bunifu (STARTUPs)

Amesema kuwa Tanzania imerekebisha mifumo mingi ili kuwezesha ubunifu na uwekezaji wa moja kwa moja nchini kuleta maendeleo, suala ambalo tumeona likifanikiwa na kwahiyo linahitaji kupaliliwa na kuungwa mkono kwa matokeo chanya.

"Nimewasikiliza wanakongamano na kupitia majadiliano haya ni wazi kwamba bado kuna namna ya kuboresha zaidi mifumo yetu ya usimamizi na utawala ili kuhakikisha Wabunifu wanapata nafasi nzuri zaidi." amesema na kuongeza kuwa, Tunatamani kuona Watanzania wanashiriki katika kukuza uchumi wa nchi yao na pengine kuazimwa katika nchi nyingine." amesema Dkt. Biteko

Amesema wapo baadhi ya Watanzania wanaofanya shughuli zao nje ya Nchi ambao wanaiwakilisha vema Tanzania kutokana na kufanya kazi kwa kuzingatia misingi iliyowekwa katika nchi hizo na hivyo kuwataka wabunifu wawekezaji kuiga mfano huo.

Aidha, Dkt. Biteko amesema kuwa Maono ya Rais wa Jamhuri ya Muungano wa Tanzania, Mhe. Dkt. Samia Suluhu Hassan yako wazi na kwa nyakati mbalimbali amekuwa akijipambanua kuhusu uwezeshaji wa makundi mbalimbali wakiwemo wabunifu wawekezaji.

"kwa kutekeleza maono ya Rais, ni muhimu kuwasikiliza, kuwaamini na kufanyia kazi maoni na bunifu zao ili kuboresha mazingira yatakayo wawezesha kutekeleza Bunifu zao na kupata fursa ndani na nje ya Nchi".

Naye, Naibu Waziri wa Mipango na Uwekezaji, Mhe. Stanslaus Nyongo akimwakilisha Waziri wa Wizara hiyo, Prof. Kitila Mkumbo amesema Serikali imekuwa ikizingatia suala la uwezeshaji kwa Wabunifu Wawekezaji ikiwa ni pamoja na kupokea maoni yao kupitia Dira ya Maendeleo ya Taifa 2050.

Nyongo ameongeza kuwa, Serikali imeboresha mazingira ya biashara kwa kupunguza gharama za biashara ili kuwawezesha wabunifu kutimiza ndoto zao.

Kwa upande wake, Waziri Mawasiliano na Teknolojia ya Habari, Mhe. Jerry Silaa amesema Wizara imeandaa mazingira ya kuwawezesha Wabunifu kufanya majaribio ya kazi zao kupitia mifumo ya Teknolojia ya Habari na Mawasiliano (TEHAMA).

Amesema Serikali imejenga vituo vya ubunifu vinane (8) katika maeneo mbalimbali ya nchi ili kuwawezesha Wabunifu kujiandaa na hatimaye kupata ajira katika nyanja mbalimbali za kiuchumi na kijamii.

Awali, Mkurugenzi Mtendaji wa TSA, Zahoro Muhaj amemshukuru Rais Samia kwa maono yake ya kuwatambua na kuwawezesha wabunifu ili waweze kuchagiza maendeleo ya nchi.

" Tunaomba salam zetu zifikishwe kwa Mheshimiwa Rais, ambaye amekuwa akitubeba na kusafiri nasi katika nchi mbalimbali ili tupate uzoefu na kukua kama mtu kama mtu mmoja mmoja na baadae kama Taifa," amesema Muhaj.

Kwa upande wake, Kaimu Makamu Mkuu wa Chuo Kikuu cha Dar es Salaam, Prof. Nelson Bonephace ameishukuru Serikali kwa jitihada za kuwawezesha wabunifu wawekezaji kukua.

Amesema katika kipindi cha mwaka 2020 hadi sasa zaidi ya dola za kimarekani Milioni 49 zimetolewa ambazo zinatumika kujenga Kampasi mpya za Kagera, Zanzibar na Lindi.

FAINALI ZA CRDB BANK SUPA CUP 2024 ZAMALIZIKA KWA MAFANIKIO JIJINI ARUSHA

Jumamosi tarehe 14 Desemba 2024, jijini Arusha, Benki ya CRDB ilihitimisha fainali za CRDB Bank Supa Cup 2024, mashindano yaliyojumuisha michezo ya soka na netiboli, kwa timu zilizoundwa na wafanyakazi wa benki hiyo, yakiwa ni mashindano yenye mbwembwe na ushindani wa hali ya juu. Timu mbalimbali kutoka kanda tofauti za Tanzania zilishiriki katika fainali hizo ambazo zilileta burudani, mshikamano, na ushindani mkubwa.

Fainali hizo zilihudhuriwa na Kaimu Katibu Tawala wa Mkoa wa Arusha, Bw. Frank Mmbando, pamoja na viongozi mbalimbali wa Benki ya CRDB. Viongozi hao ni pamoja na Mkurugenzi Mtendaji, Abdulmajid Nsekela, Mkurugenzi wa CRDB Bank Congo, Jessica Nyachiro, Afisa Mkuu wa Fedha, Fredrick Nshekanabo, Afisa Mkuu wa Uendeshaji, Bruce Mwile, Afisa Mkuu wa Biashara, Boma Raballa na Mkurugenzi wa Rasilimali Watu, Godfrey Rutasingwa.

Matokeo ya Soka

Katika mchezo wa kutafuta mshindi wa nafasi ya tatu, timu ya Ulipo Tupo FC kutoka Kanda ya Ziwa iliibuka na ushindi wa mabao 2-0 dhidi ya Boom Advance FC kutoka Kanda ya Kaskazini.

Fainali kubwa ya soka ilishuhudia timu ya iMbeju FC kutoka Kanda ya Pwani ikiibuka kidedea kwa ushindi mnono wa mabao 4-0 dhidi ya Al Barakah FC kutoka Kanda ya Magharibi. Ushindi huu umeifanya iMbeju FC kutwaa ubingwa wa CRDB Bank Supa Cup 2024.

Matokeo ya Netiboli

Kwa upande wa netiboli, nafasi ya tatu ilichukuliwa na Lipa Hapa Queens kutoka Kanda ya Dar es Salaam baada ya kuwashinda Popote Inatiki Queens kutoka Kanda ya Kati kwa alama 50-45.

Fainali ya netiboli iliwaweka uso kwa uso iMbeju Queens kutoka Kanda ya Pwani na Ulipo Tupo Queens kutoka Kanda ya Ziwa. iMbeju Queens walifanikiwa kushinda kwa alama 45-39, na hivyo kutwaa ubingwa wa netiboli.

Zawadi na Tuzo

Mashindano haya yalihitimishwa kwa utoaji wa tuzo mbalimbali kwa washindi wa michezo yote, huku fedha taslimu, medali, na vikombe vikikabidhiwa kwa washindi kama ifuatavyo:

Soka

Mshindi wa Kwanza: iMbeju FC – TZS 13,000,000/=

Mshindi wa Pili: Al Barakah FC – TZS 9,000,000/=

Mshindi wa Tatu: Ulipo Tupo FC – TZS 6,000,000/=

Netiboli

Mshindi wa Kwanza: iMbeju Queens – TZS 9,000,000/=

Mshindi wa Pili: Ulipo Tupo Queens – TZS 6,000,000/=

Mshindi wa Tatu: Lipa Hapa Queens – TZS 4,000,000/=

Tuzo Binafsi za Soka

Mchezaji Bora wa Mashindano (MVP): Godwin Edward Junye (iMbeju FC) – TZS 500,000/=

Mfungaji Bora: Abdallah Magoe (Ulipo Tupo FC) – TZS 500,000/=

Kipa Bora: Abbas Wadi Makame (iMbeju FC) – TZS 300,000/=

Mchezaji Bora wa Mechi ya Fainali: Stanislaus John Masaswe (iMbeju FC) – TZS 300,000/=

Tuzo Binafsi za Netiboli

Mchezaji Bora wa Mashindano (MVP): Ikutungangisya Richard (Ulipo Tupo Queens) – TZS 500,000/=

Mfungaji Bora: Saada Ally Juma (Lipa Hapa Queens) – TZS 500,000/=

Mchezaji Bora wa Mechi ya Fainali: Tumaini Ndosi (iMbeju Queens) – TZS 300,000/=

Akizungumza katika fainali hizo, Mkurugenzi Mtendaji wa Benki ya CRDB, Abdulmajid Nsekela, alisema kuwa benki hiyo imeweka mikakati na sera mbalimbali za kuongeza chachu kwa wafanyakazi wake, na michezo ni mojawapo ya nyenzo muhimu katika kuhakikisha wanajenga umoja, afya njema, na furaha miongoni mwao.

"Mashindano ya CRDB Bank Supa Cup ni zaidi ya michezo; ni jukwaa la mshikamano, mawasiliano, na afya bora kwa wafanyakazi wetu. Tunajivunia kuona mshindano haya yakiendelea kuwa sehemu muhimu ya utamaduni wa Benki yetu," alisema Nsekela.

Kwa upande wake, Mkurugenzi wa Rasilimali Watu, Godfrey Rutasingwa, alisisitiza umuhimu wa mashindano hayo katika kuongeza mshikamano miongoni mwa wafanyakazi. "Michezo huchangia kwa asilimia kubwa kuwaleta watu pamoja, na kupitia Supa Cup tumeweza kuona mshikamano wa kipekee kati ya wafanyakazi wetu kutoka kanda mbalimbali," alisema Rutasingwa.

Mashindano ya CRDB Bank Supa Cup 2024 yamehitimishwa kwa mafanikio makubwa, huku timu ya iMbeju kutoka Kanda ya Pwani iking'ara kwa kushinda vikombe vyote vya soka na netiboli. Shangwe na matarajio yameanza kuandaliwa kwa mashindano ya mwaka 2025, huku wafanyakazi na mashabiki wakiisubiri kwa hamu kubwa msimu ujao wa burudani.

Source

Sijui Mutale Amepatwa na Nini, Muda Mwingi Anapoteza Mipira na Pasi Sana

 

Sijui Mutale amepatwa na nini?

"Muda mwingi anapoteza mipira,pasi zake nyingi zinakosa njia,miguu yake imekosa magoli na assist."

.

"Inawezekana anahitaji muda wa kuzoea ligi,ila atambue hii ni Tanzania sehemu ambapo hakuna project za muda mrefu."

.

"Haraka sana anatakiwa kurudi kwenye uwanja wa mazoezi na kufanyia kazi mapungufu yake….bado Wana-Simba wanamdai sana."

.

Anasema; Mchambuzi Hans

MBUNGE BYABATO AWAFARIJI WATOTO YATIMA 200 KUPITIA TAMASHA LA BUKOBA MJINI MPYA FESTIVAL 2024

Mbunge wa Jimbo la Bukoba Mjini, Wakili Stephen Byabato, kwa kushirikiana na wadau mbalimbali, wamewakutanisha watoto yatima 200 wanaoishi katika vituo vya watoto yatima Manispaa ya Bukoba. Lengo kuu ikiwa ni kuwapa faraja kwa kuwapa mahitaji muhimu ya shule, vyakula na mahitaji binafsi ikiwa ni sadaka na shukrani kwa Mwenyezi Mungu kutoka kwa wadau hawa kuelekea mwisho wa mwaka 2024.

Tamasha hilo limefanyika tarehe 14/12/2024 kwa jitihada za wadau waliopo katika Kundi Songezi (WhatsApp Group) la Bukoba Mjini Mpya chini ya ulezi wa Mhe. Byabato na wadau nje ya kundi hilo. 

Katika maandalizi ya tamasha hilo, zaidi ya Tsh 10 Milioni zilitolewa na wadau na leo wamekabidhi sadaka mbalimbali kwa watoto yatima zikiambatana na tuzo za utambuzi kwa waanzilishi na vyeti vya shukrani kwa wasimamizi wa vituo hivyo kwa kazi kubwa ya kuijenga Jamii bora ya Bukoba.

Pamoja na zawadi nyingi zilizotolewa (zikiwemo za sikukuu), vimetolewa vitabu vya dini (Biblia na Quran Takatifu) yametolewa madawati 50 kwa shule za msingi zenye uhitaji zaidi za Byabato, Bilele, Rwamishenye na Bunena. 

Aidha katika kuunga jitihada za Mbunge Byabato, Mdau kutoka Afrika Kusini, Injinia Datusi, ametoa vitanda 20 kwa watoto yatima, huku wafanyabiashara wa Soko Kuu Bukoba na wadau wengine wakitoa zawadi mbalimbali kwa watoto hao, TRA Kagera wakakamilisha furaha kwa kuwalisha wahudhuriaji wote zaidi ya 500 chakula cha pamoja cha kiwango cha juu.

Mbunge Byabato kakamilisha Tamasha hili kwa kuwaalika wana Bukoba wote katika Tamasha kubwa la Mkoa wa Kagera chini ya uanzilishi na usimamizi wa Mhe. Mkuu wa Mkoa Bi. Hajjat Fatma A. Mwassa kuanzia jumatatu ya tarehe 16/12/2024. 

Wadau mbalimbali wamepongeza ubunifu, mafanikio na majitoleo hayo yaliyoratibiwa vema na Kamati ya Maandalizi. Wameomba tamasha hili liwe endelevu kwa ajili ya kuwaleta pamoja watu wote.

Source

KIKOSI Simba Vs Sfaxien Leo Tarehe 15 December 2024

KIKOSI Simba Vs Sfaxien Leo Tarehe 15 December 2024

Simba itamenyana na Sfaxien katika hatua ya Makundi ya Kombe la Shirikisho Desemba 15, mechi ikianza saa 16:00 kwa saa za kwenu.

Simba itaingia kwenye mechi hii kufuatia kipigo kutoka kwa CS Constantine mnamo Desemba 8, ikitarajia kurejea kwa kiwango bora. Matokeo tofauti yanaweza kufikiwa, ikizingatiwa kwamba uchezaji wao wa hivi majuzi nyuma umekuwa na nguvu nyumbani, kama inavyothibitishwa na karatasi safi tatu mfululizo.

Sfaxien wanaingia kwenye mchezo huu baada ya kupoteza kwa Bravos do Maquis katika hatua ya Makundi ya Kombe la Shirikisho mnamo Desemba 8. Wachezaji wao wa nyuma wamekosa uthabiti, huku wakiruhusu mabao katika mechi tatu mfululizo.

Udaku Special inaangazia Simba dhidi ya Sfaxien katika muda halisi, ikitoa mtiririko wa moja kwa moja na matokeo ya moja kwa moja ya mechi, safu za timu, takwimu kamili za mechi, maoni ya mechi ya moja kwa moja na muhtasari wa video rasmi. Tunashughulikia mechi zote za Hatua ya Makundi ya Kombe la Shirikisho kwa wakati halisi na kutoa utiririshaji wa moja kwa moja inapowezekana.

KIKOSI Simba Vs Sfaxien Leo 

1. Camara
2. Kapombe
3. Hussein
4. Hamza
5. Che Malone
6. Kagoma
7. Kibu
8. Fernandes
9. Ateba
10. Ahoua
11. Mutale

WIZARA YA ELIMU YARIDHISHWA NA MIRADI YA TEA CHALINZE

 Mwalimu mkuu wa shule ya Msingi Kibiki Bi. Magreth Kileo (aliyesimama), akitoa taarifa ya ujenzi wa miradi ya madarasa chini ya ufadhiri wa mamlaka ya Elimu Tanzania(TEA) kwa Mkurugenzi Msaidizi wa uthibiti ubora wa elimu toka wizara ya Elimu, sayansi na teknolojia Bi. Monica Mpululu (katikati) na Afisa miradi toka TEA ,Bi. Mwafatma Mohamed(kulia)

AFISA elimu awali na msingi halmashauri ya Chalinze Bi. Miriam Kihiyo (kulia) na Mthibiti  mkuu ubora wa shule wa halmashauri hiyo(kushoto)

NA. ELISANTE KINDULU, CHALINZE

MKURUGENZI msaidizi wa uthibiti ubora wa elimu Wizara ya Elimu,Sayansi na Teknolojia, Bi. Monica Mpululu, ameridhishwa na miradi ya ujenzi wa madarasa katika halmashauri ya Chalinze mkoa wa Pwani.

Bi. Monica, aliyasema hayo hivi karibuni alipotembelea shule ya Msingi Kibiki akiambatana na viongozi mbalimbali kutoka mamlaka ya elimu Tanzania(TEA).

Mkurugenzi huyo alisema, ujenzi wa madarasa matatu, ofisi ya mwalimu mkuu pamoja matengezo ya madawati yaliyofadhiliwa na TEA, umefanyika kwa ustadi mkubwa japo kuna sehemu ndogo ya kufanya marekebisho kutokana na changamoto ya ardhi.

Naye mwalimu mkuu wa shule hiyo Bi. Magreth Kileo aliishukuru TEA kwa miradi hiyo ingawa shule bado inakabiliwa na uhaba wa  nyumba za walimu, upungufu wa madawati na ofisi ya walimu.

Mkurugenzi huyo aliambatana na Bi. Mwafatma Mohamed(afisa miradi wa TEA),  Bi. Eliafile Solla(afisa uhusiano wa TEA ),Bi. Miriam Kihiyo(afisa elimu ya awali na msingi halmashauri ya Chalinze) na Mthibiti mkuu wa shule halmashauri ya Chalinze.

TIA YAPONGEZWA ELIMU KWA VITENDO

Naibu Katibu Mkuu Wizara ya Fedha, Bi. Jenifa Christian Omolo, akimkabidhi cheti cha pongezi kwa kufanya vizuri katika masomo yake ya Rasilimali Watu, Bi. Naf-hat fahmi Hamed, wakati wa Mahafali ya 22 ya Taasisi ya Uhasibu Tanzania (TIA) katika Kampasi ya Dar es Salaam Viwanja vya Kurasini ambayo ni Makao Makuu ya Taasisi hiyo.

**********************

NA EMMANUEL MBATILO, DAR ES SALAAM

TAASISI ya Uhasibu Tanzania (TIA) imepongezwa kwa kuwa mstari wa mbele kupitia mpango wa vituo atamizi, unaowawezesha wanafunzi kujiajiri, kuajirika, na kuchangia uchumi wa taifa.

Aidha, wamepongezwa kwa kuwaendeleza wanafunzi wenye mawazo ya kibunifu ili waweze kufanikisha malengo yao.

Pongezi hizo zimetolewa leo Desemba 13, 2024 Naibu Katibu Mkuu wa Wizara ya Fedha Jenifa Omolo akimwakilisha Waziri wa Fedha, Dkt. Mwigulu Nchemba kama mgeni rasmi katika Mahafali ya 22 ya Taasisi ya Uhasibu Tanzania (TIA) katika Kampasi ya Dar es Salaam.

Amesema katika ulimwengu wa sasa wa teknolojia, amewasihi wahitimu kutumia ubunifu wao kutatua changamoto na fursa za kijamii.

"Mitandao ya kijamii ni rasilimali yenye nguvu. Itumieni kwa njia chanya kama vile kujifunza, kujitangaza kibiashara, na kujipatia kipato". Amesema.

Amesema TIA ni miongoni mwa taasisi zilizowezeshwa jumla ya shilingi za Kitanzania Bilioni 58.1, kwa ajili ya kukamilisha miradi mbalimbali ya maendeleo hususan ujenzi wa miundombinu ya kusomea na kufundishia.

Aidha ameupongeza uongozi na watumishi wa TIA kwa kuhakikisha miradi hii inatekelezwa kwa wakati.

"Niwasisitize kuhakikisha inawekwa mipango Madhubuti ya kutunza miundombinu hiyo". Amesema

Kwa upande wake Mwenyekiti wa Bodi ya Ushauri ya Wizara Profesa Jehovaness Aikael ameipongeza Serikali kwa juhudi zake kubwa katika kuboresha mazingira ya kujifunzia na kufundishia kupitia ujenzi wa miundombinu katika Kampasi zake za Mbeya, Mtwara, Mwanza, Singida na Zanzibar.

Pamoja na hayo amewaasa wahitimu kuwa mabalozi wazuri wa TIA kwa kuonesha uadilifu na ufanisi. "Peperusheni bendera ya TIA kwa mafanikio, na endeleeni kuwa mfano wa kuigwa katika jamii na sehemu za kazi".

Naye Mtendaji Mkuu wa Taasisi ya Uhasibu Tanzania (TIA) Prof. William Pallangyo, amesema kuwa kumekuwa na ongezeko la idadi ya Wanafunzi mwaka hadi mwaka hilo limechangiwa na kuongezeka idadi ya wanufaika wa mikopo kupitia Bodi ya Mikopo ya Wanafunzi wa Elimu ya Juu (HESLB).

Hata hivyoamesema kuwa katika mwaka wa masomo 2024/2025, jumla ya wanachuo 12,263 wamenufaika na mkopo wenye thamani ya takribani shilingi bilioni 7.49 kiasi ambacho ni sawa na ongezeko la asilimia 35.9 ikilinganishwa na wanachuo 9,025 katika mwaka wa masomo 2023/2024, waliopokea jumla ya shilingi bilioni 6.14.

Ameeleza kuwa ni hatua muhimu inayotimiza dhamira ya TIA ya kufikisha huduma karibu na wananchi kupitia Kampasi zake zilizopo Kanda zote za Tanzania.

Amesema kuwa Kampasi hizo zenye jumla ya Wanachuo 31,084, zipo kimkakati katika Mikoa ya Dar es Salaam (Kanda ya Pwani), Singida (Kanda ya Kati), Mbeya (Kanda ya Nyanda za Juu usini), Mtwara (Kanda ya Kusini), Mwanza (Kanda ya Ziwa), Kigoma (anda ya Magharibi), Tanga (Kanda ya Kaskazini), na Zanzibar.

Naibu Katibu Mkuu Wizara ya Fedha Bi. Jenifa Christian Omolo, akizungumza na hadhara wakati wa Mahafali ya 22 ya Taasisi ya Uhasibu Tanzania (TIA) katika Kampasi ya Dar es Salaam Viwanja vya Kurasini ambayo ni makao makuu ya Taasisi hiyo.

Naibu Katibu Mkuu Wizara ya Fedha, Bi. Jenifa Christian Omolo, akiteta jambo na Mtendaji Mkuu wa Taasisi ya Uhasibu Tanzania (TIA) Prof. William Pallangyo, wakati wa Mahafali ya 22 ya Taasisi ya Uhasibu Tanzania (TIA) katika Kampasi ya Dar es Salaam Viwanja vya Kurasini ambayo ni makao makuu ya Taasisi hiyo.

Mwenyekiti wa Bodi ya Ushauri ya Taasisi ya Uhasibu, Prof. Jehovaness Aikael, akizungumza na hadhara wakati wa Mahafali ya 22 ya Taasisi ya Uhasibu Tanzania (TIA) katika Kampasi ya Dar es Salaam Viwanja vya Kurasini ambayo ni Makao Makuu ya Taasisi hiyo.

Naibu Katibu Mkuu Wizara ya Fedha Bi. Jenifa Christian Omolo (katikati), akiwa katika maandamano ya Mahafali ya 22 ya Taasisi ya Uhasibu Tanzania (TIA) katika Kampasi ya Dar es Salaam Viwanja vya Kurasini ambayo ni Makao Makuu ya Taasisi hiyo. Kushoto ni Mtendaji Mkuu wa Taasisi ya Uhasibu Tanzania (TIA) Prof. William Pallangyo na kulia ni Mwenyekiti wa Bodi ya Ushauri ya Taasisi ya Uhasibu Prof. Jehovaness Aikael.

Baadhi ya wahitimu wakiwa wamesimama wakisubiri kutunukiwa shahada mbalimbali katika Mahafali ya 22 ya Taasisi ya Uhasibu Tanzania (TIA) katika Kampasi ya Dar es Salaam Viwanja vya Kurasini ambayo ni makao makuu ya Taasisi hiyo.

WATAALAM WATUMIKIENI WAFUGAJI, WAVUVI KWA WELEDI-DKT. KIJAJI

Katibu Mkuu wa Wizara ya Mifugo na Uvuvi Prof. Riziki Shemdoe (Kulia) akimweleza  Mhe. Dkt. Ashatu Kijaji (Katikati) kuhusu shughuli zinazotekelezwa na Wizara hiyo muda mfupi baada ya Mhe. Dkt. Kijaji kuwasili makao Makuu ya Wizara hiyo yaliyopo kwenye mji wa Serikali eneo la Mtumba Jijini Dodoma  Disemba 13, 2024.

Waziri wa Mifugo na Uvuvi Mhe. Dkt. Ashatu Kijaji akieleza  mikakati ya Wizara hiyo inayolenga kuimarisha sekta za Mifugo na Uvuvi muda mfupi baada ya kuwasili makao makuu ya Wizara hiyo yaliyopo kwenye Mji wa Serikali eneo la Mtumba jijini Dodoma Disemba 13, 2024.

Waziri wa Mifugo na Uvuvi Mhe. Dkt. Ashatu Kijaji akisaini kitabu cha wageni  baada ya kuwasili ofisini kwake makao Makuu  ya Wizara hiyo yaliyopo kwenye Mji wa Serikali eneo la Mtumba Jijini Dodoma Disemba 13, 2024.

****

Waziri wa Mifugo na Uvuvi Mhe. Dkt. Ashatu Kijaji amewataka wataalam wa Wizara hiyo kutumia taaluma walizonazo kuwatumikia wafugaji na Wavuvi kwa weledi wakati wa utekelezaji wa majukumu yao.

Dkt. Kijaji amesema hayo leo Disemba 13, 2024 mara baada ya kuwasili na kupokelewa kwenye Ofisi za makao makuu ya Wizara hiyo zilizopo Mji wa Magufuli eneo la Mtumba jijini Dodoma ambapo amebainisha kuwa Viongozi wengi na wataalam wamesoma kupitia kodi za Watanzania hivyo hawana budi kuwahudumia ipasavyo pindi wakifika uwandani.

"Kule uwandani wafugaji na wavuvi wetu wanajua zaidi kuliko sisi lakini sisi tumesoma ili tuweze kuwasaidia kile wafanye kwa usahihi zaidi kile wanachofanya" Amesema Mhe. Dkt. Kijaji.

Mhe. Dkt. Kijaji ameongeza kuwa dhamira yake ni kuendeleza mafanikio yaliyopatikana wakati wa mtangulizi wake Mhe. Abdallah Ulega ikiwa ni pamoja na kuongeza mchango wa sekta za Mifugo na Uvuvi kufikia asilimia 20 ifikapo mwaka 2030.

Katika hatua nyingine Mhe. Kijaji ameelezea kusikitishwa kwake na mgogoro wa wakulima na wafugaji uliotokea Wilayani Kilosa hivi karibuni ambapo ameitangaza Wilaya hiyo kama kanda maalum na kuahidi kutumia kanda hiyo kama mfano wa kushughulikia migogoro ya aina hiyo kwenye maeneo mengine.

"Nimemjulisha mkuu wa Mkoa wa Morogoro kuwa tutakuwa huko Wiki ijayo ambapo tutapanga kwa pamoja kati ya watu wa Ardhi, Kilimo na Mifugo ili tuondoe hii migogoro ambayo haina umuhimu kwa wafugaji na wakulima wetu kwa sababu sisi ni wamoja na wakati mwingine mfugaji huyo huyo ndo mkulima.

Mhe. Dkt. Kijaji amehitimisha maelekezo yake kwa kugusia sera ya uchumi wa buluu ambapo amewataka wataalam wa sekta ya Uvuvi kuhakikisha sekta hiyo inakua kwa kasi na utekelezaji wake unabadili maisha ya Wavuvi kwa ujumla.