TMA YAWAONYA WAKAZI TANGA KUCHUKUA TAHADHARI DHIDI YA MVUA KUBWA

 

NA REBECA DUWE TANGA 

Wakazi wa Mkoa wa Tanga wametakiwa kuchukulia kwa uzito taarifa za utabiri wa hali ya hewa na kujiandaa kukabiliana na uwezekano wa kunyesha kwa mvua kubwa katika msimu ujao wa mvua, huku kukiwa na dalili za kuwepo kwa hali ya hewa ya El Niño.

Mamlaka ya Hali ya Hewa Tanzania (TMA) imeonya kuwa mvua hizo zinaweza kusababisha mafuriko na majanga mengine yanayohusiana na hali ya hewa, hususan katika maeneo ya mabondeni.

Meneja wa TMA Mkoa wa Tanga, Kurwa Mbwambo, alitoa tahadhari hiyo jana alipokuwa akizungumza na waandishi wa habari ofisini kwake jijini Tanga, ambapo aliwataka wananchi pamoja na mamlaka zinazohusika na usimamizi wa majanga kutumia taarifa za hali ya hewa kuchukua hatua za tahadhari mapema.

Mbwambo alisema utabiri wa sasa unaonyesha kuwa mvua za msimu mfupi, maarufu kama mvua za Vuli, zinatarajiwa kuanza katika wiki ya kwanza ya Oktoba 2026 na kuendelea hadi Januari 2027.

Alisema viashiria vya hali ya hewa vinaonyesha kuwepo kwa hali ya El Niño, ambayo inaweza kuathiri mwenendo wa mvua katika maeneo mbalimbali nchini.

“Wananchi wasipuuze taarifa za utabiri wa hali ya hewa kwa sababu zinatolewa ili kuwawezesha kuchukua hatua za tahadhari na kulinda maisha pamoja na mali zao,” alisema Mbwambo.

Alisema uwekezaji mkubwa unaofanywa na Serikali katika vifaa vya utabiri wa hali ya hewa pamoja na wataalamu umeboresha usahihi wa utabiri, ambapo kwa sasa utabiri wa hali ya hewa unafikia kiwango cha makadirio cha asilimia 94 cha usahihi.

Kwa mujibu wake, TMA tayari imewasilisha taarifa za kina za utabiri kwa Wakurugenzi Watendaji wa Halmashauri zote pamoja na mamlaka za wilaya, zikiwemo taarifa zinazoonyesha namna kila wilaya inavyoweza kuathiriwa na mvua hizo zinazotarajiwa.

“Tunatarajia mamlaka za wilaya tayari zimewasilisha, au zitawasilisha taarifa hizi kwa serikali za vijiji ili ziwafikie wananchi,” alisema.

Mbwambo aliwataka wananchi wanaoishi mabondeni na maeneo mengine yaliyo katika hatari ya mafuriko kuchukua tahadhari mapema badala ya kusubiri hadi mvua kubwa zianze kunyesha.

Aidha, aliwataka wananchi kusafisha mifereji ya maji inayozunguka makazi yao na katika maeneo ya jamii ili kuzuia kuziba na hatimaye kusababisha mafuriko.

Tahadhari hiyo inatolewa wakati TMA ikieleza katika mtazamo wake wa msimu wa mvua kuwa kutakuwa na shughuli kubwa za mvua katika maeneo kadhaa nchini zinazohusishwa na hali ya El Niño iliyopo.

TMA imeeleza kuwa ingawa mvua za Vuli zinatarajiwa rasmi kuanza mwezi Oktoba katika maeneo mengi, baadhi ya maeneo nchini yanaweza kuanza kupata mvua mapema kuanzia Septemba 2026.

Mamlaka hiyo pia imeonya kuwa hali ya El Niño kuelekea mwishoni mwa mwaka inaweza kusababisha msimu wa mvua unaoanza Novemba 2026 hadi Aprili 2027 kuanza mapema katika baadhi ya maeneo ambayo kwa kawaida hupata msimu mmoja mkuu wa mvua kwa mwaka.

Hata hivyo, TMA imesisitiza kuwa utabiri wa msimu hutoa mwelekeo wa hali ya hewa kwa maeneo mapana na vipindi vya miezi mitatu. Kwa hiyo, mabadiliko ya muda mfupi katika mwenendo wa mvua yataendelea kufuatiliwa kupitia utabiri wa muda wa kati na mfupi.

Wananchi na mamlaka wameelekezwa kuendelea kufuatilia taarifa mpya za hali ya hewa zinazotolewa na TMA na kuzitumia katika kupanga maandalizi pamoja na hatua za kupunguza hatari ya majanga.

Kwa Mkoa wa Tanga, ambako baadhi ya jamii zinaishi katika maeneo yaliyo hatarini kukumbwa na mafuriko, ujumbe wa Mbwambo ni muhimu zaidi wakati maandalizi ya kukabiliana na msimu ujao wa mvua yakishika kasi.

SERIKALI YAZINDUA 'UGHAIBUNI LOAN'

Naibu Waziri, Ofisi ya Waziri Mkuu - Kazi, Ajira na Mahusiano, Mhe. Dkt. Evaline Munisi (wa tatu kutoka kushoto) akizindua rasmi Ughaibuni Loan wakati wa hafla ya kuwaaga Watanzania wanaokwenda kufanya kazi nje ya  nchi, wakati wa hafla hiyo iliyofanyika Makao Makuu ya Benki ya CRDB, Palm Beach Jijini Dar es Salaam tarehe 27 Agosti, 2026.

****************

-Kuwezesha vijana kumudu mahitaji ya msingi anapoenda kufanya kazi nje ya nchi

Na: OWM (KAM), Dar es Salaam

Serikali imesema itaendelea kuhakikisha vijana nchini wanaendelea kunufaika na fursa za nje ya nchi na zenye staha kwa kushirikiana na wadau wa ndani na nje ya nchi.

Akizungumza jijini Dar es Salaam Agosti 27,2026 wakati wa uzinduzi wa mkopo wa Ughaibuni Loan unaoratibiwa na Benki ya CRDB pamoja na kuwaaga vijana 130 kati ya 530 wanaotarajia kwenda kufanya kazi nje ya nchi, Naibu Waziri Ofisi ya Waziri Mkuu - Kazi, Ajira na Mahusiano, Dkt. Evaline Munisi amesema Serikali inatambua ajira za nje ya nchi kama nyenzo muhimu ya kupanua fursa za ajira, kuongeza kipato cha vijana, kukuza ujuzi na kuwajengea uzoefu wa kimataifa.

“Matokeo ya jitihada hizi yamewezesha Watanzania 14,613 kupata ajira nje ya nchi tangu Serikali ya Awamu ya Sita kuingia madarakani. Kati ya Julai 2025 hadi sasa, Watanzania 8,428 wameunganishwa na waajiri nje ya nchi,” amesema Dkt. Munisi.

Amesema mafanikio hayo yameifanya Tanzania kuendelea kuaminika kuwa na nguvu kazi salama na yenye staha duniani.

Kuhusu uzinduzi wa Ughaibuni Loan, Dkt. Munisi amesema mkopo huo unalenga kuwawezesha vijana waliopata ajira nje ya nchi kupata fedha nafuu za kugharamia maandalizi ya safari ikiwemo tiketi ya ndege, bima na visa.

“Ughaibuni Loan siyo msaada bali ni mkopo wa uwezeshaji. Nawasihi vijana wahakikishe wanafanya marejesho ili na wengine wapate fursa,” amesisitiza.

Kwa upande wake Kaimu Mkurugenzi Mkuu wa CRDB, Bw. Pendason Philemon amesema benki imetenga jumla ya Shilingi bilioni 250 kwa miaka mitano kutoa mikopo ya kati ya Sh. 500,000 hadi milioni 20 kwa kila kijana kulingana na gharama za kufika kwa mwajiri wake.

“Kigezo muhimu ni kuwa na mkataba au barua ya ajira iliyothibitishwa na wakala. Marejesho yatakuwa kwa miezi 24 na tunatoa kipindi cha neema cha miezi 2 kwa riba ya asilimia 15,” amesema Philemon.

Mwenyekiti wa Chama cha Mawakala Binafsi wa Ajira TRAA, Bw. Abdala Khalid amesema mkopo huo utawaepusha vijana na watu wasio na nia njema.

Naibu Katibu Mkuu Ofisi ya Waziri Mkuu - Kazi, Ajira na Mahusiano, Bi. Zuhura Yunus amesema Ofisi ya Waziri Mkuu - Kazi,Ajira na Mahusiano inaendelea kutafuta masoko ya uhakika ya ajira ikiwemo Saudi Arabia, Oman, Qatar, Denmark na Ujerumani.

Mmoja wa wanufaika, Dickson Tadeo Mbaga amesema kupitia mkopo huo aliweza kugharamia visa, tiketi na bima. “Ninawasihi vijana wenzangu wachangamkie fursa hii,” amesema.

Serikali imesema itaendelea kuhakikisha vijana 530 wanaokwenda kufanya kazi ughaibuni katika fani mbalimbali ikiwemo ujenzi wanalindwa na kazi zao zinakuwa zenye staha.

Naibu Waziri, Ofisi ya Waziri Mkuu - Kazi, Ajira na Mahusiano, Mhe. Dkt. Evaline Munisi akizungumza wakati wa hafla ya uzinduzi wa Ughaibuni Loan pamoja na tukio la kuwaaga na Watanzania wanaokwenda kufanya kazi nje ya  nchi, iliyofanyika Makao Makuu ya Benki ya CRDB, Palm Beach Jijini Dar es Salaam, tarehe 27 Agosti, 2026.

Naibu Katibu Mkuu, Ofisi ya Waziri Mkuu - Kazi, Ajira na Mahusiano, Bi. Zuhura Yunus akieleza jambo wakati wa hafla ya uzinduzi wa Ughaibuni Loan pamoja na tukio la kuwaaga na Watanzania wanaokwenda kufanya kazi nje ya  nchi, iliyofanyika Makao Makuu ya Benki ya CRDB, Palm Beach Jijini Dar es Salaam, tarehe 27 Agosti, 2026.

Kaimu Mkurugenzi Mkuu wa Benki ya CRDB, Bw. Pendason Philemon akieleza manufaa ya Ughaibuni Loan wakati wa uzinduzi rasmi wa Mikopo kwa Wafanyakazi wanaofanya kazi nje ya nchi (Ughaibuni Loan) iliyofanyika katika Makao Makuu ya CRDB, Palm Beach Jijini Dar es Salaam, tarehe 27 Agosti, 2026.

Baadhi ya Wadau na Vijana walionufaika na Ajira Nje ya Nchi wakifuatilia matukio wakati wa hafla ya uzinduzi wa Ughaibuni Loan pamoja na tukio la kuwaaga na Watanzania wanaokwenda kufanya kazi nje ya  nchi, iliyofanyika Makao Makuu ya Benki ya CRDB, Palm Beach Jijini Dar es Salaam, tarehe 27 Agosti, 2026.

Naibu Waziri, Naibu Waziri, Ofisi ya Waziri Mkuu - Kazi, Ajira na Mahusiano, Mhe. Dkt. Evaline Munisi akizungumza wakati wa hafla ya uzinduzi wa Ughaibuni Loan pamoja na tukio la kuwaaga na Watanzania wanaokwenda kufanya kazi nje ya  nchi, iliyofanyika Makao Makuu ya Benki ya CRDB, Palm Beach Jijini Dar es Salaam, tarehe 27 Agosti, 2026.

Maktaba Mtandao Kuimarisha Huduma, Kuunganisha Mifumo ya Serikali

 

Na Rebeca Duwe Tanga 

Mfumo wa Maktaba Mtandao umeanza kuleta matokeo chanya katika utoaji wa huduma za maktaba nchini, huku ukitarajiwa kuongeza ufanisi wa upatikanaji wa taarifa na kurahisisha mawasiliano kati ya mifumo mbalimbali ya serikali na taasisi za elimu.

Mkurugenzi Mkuu wa Bodi ya Huduma za Maktaba Tanzania (TLSB), Dkt. Mboni Ruzegea, amesema mfumo huo umejengwa kwa kuzingatia umuhimu wa mifumo ya serikali kusomana, jambo ambalo limekuwa likisisitizwa na Rais wa Jamhuri ya Muungano wa Tanzania, Mheshimiwa Samia Suluhu Hassan.

Dkt. Ruzegea amesema tayari Maktaba Mtandao ina uwezo wa kuhusishwa na mifumo mbalimbali ya serikali, ikiwemo mifumo ya malipo ya serikali, madeni ya serikali pamoja na mifumo inayohusiana na sekta ya elimu, ikiwemo mfumo wa takwimu unaosimamiwa chini ya Wizara ya Elimu.

Amesema kuunganishwa kwa mifumo hiyo kutasaidia kurahisisha upatikanaji na matumizi ya taarifa, huku wananchi na wadau wa huduma za maktaba wakinufaika zaidi na teknolojia katika kupata huduma.

Dkt. Ruzegea ameyasema hayo alipokuwa akitoa ufafanuzi kuhusu kuanzishwa na kuanza kutumika kwa Maktaba Mtandao katika viwanja vya Usagara, ambako kulikuwa na Maonesho ya Kitaifa ya Wiki ya Elimu, Ujuzi na Ubunifu.

Watunzi wa vitabu watakiwa kuwasilisha machapisho

Katika hatua nyingine, Dkt. Ruzegea amewataka waandishi na watunzi wa vitabu, majarida na machapisho mengine kuhakikisha wanawasilisha kazi zao katika Maktaba Kuu ya Taifa ili kupata namba ya utambulisho na kuwezesha machapisho hayo kuhifadhiwa kama sehemu ya kumbukumbu za taifa.

Kwa mujibu wa utaratibu huo, mwandishi anatakiwa kuwasilisha nakala mbili za chapisho lake. Hata hivyo, kutokana na mabadiliko ya teknolojia na kuongezeka kwa matumizi ya mifumo ya kidijitali, watunzi wanatakiwa pia kuwasilisha nakala ya kidijitali (soft copy) ya chapisho husika.

Dkt. Ruzegea amesema hatua hiyo itasaidia kuhakikisha machapisho yanayotengenezwa nchini yanahifadhiwa kwa njia salama na yanaendelea kuwa sehemu ya hazina ya maarifa na kumbukumbu za Tanzania.

Kongamano la huduma za maktaba kurejea

Aidha, Dkt. Ruzegea amesema Bodi inatarajia kuandaa kongamano kubwa la huduma za maktaba, ambalo limekuwa likifanyika kila mwaka lakini lilisimama kwa kipindi cha miaka miwili.

Amesema kongamano hilo litakuwa na nafasi ya kujadili na kuendeleza huduma za maktaba nchini, huku Bodi ikitarajia kufanya urasimishaji wa Maktaba Mtandao, badala ya uzinduzi.

Amesema sababu ya kufanya urasimishaji badala ya uzinduzi ni kwamba huduma hiyo tayari imeanza kutumika na wananchi wanaendelea kunufaika nayo.

Chuo cha Ukutubi chafungua milango kwa Watanzania

Kwa upande wake, Kaimu Mkuu wa Chuo cha Ukutubi na Uhifadhi Nyaraka, Bertha Mwaihojo, amewakaribisha Watanzania kujiunga na chuo hicho, akieleza kuwa ni miongoni mwa vyuo vikongwe nchini vinavyotoa mafunzo katika eneo la ukutubi na uhifadhi wa nyaraka.

Mwaihojo amesema chuo hicho kinaendeshwa na Bodi ya Huduma za Maktaba Tanzania na kinatoa mafunzo katika ngazi ya cheti na stashahada katika fani za ukutubi, uhifadhi wa nyaraka pamoja na utunzaji wa kumbukumbu.

Amesema katika kuendana na mahitaji ya soko la ajira na mabadiliko ya teknolojia, chuo hicho kinatarajia kuanzisha kozi mpya katika mwaka huu wa masomo, zikiwemo Teknolojia ya Habari na Mawasiliano (ICT) na Business Information Technology.

Kwa mujibu wa Mwaihojo, chuo hicho kwa sasa kina kampasi mbili nchini, ambazo ni Bagamoyo na Dar es Salaam, hatua inayowapa fursa Watanzania kupata mafunzo katika eneo la ukutubi, uhifadhi wa nyaraka na teknolojia ya taarifa.

Teknolojia kuongeza ufanisi wa huduma za maktaba

Kwa ujumla, kuanza kutumika kwa Maktaba Mtandao kunaweka msingi wa kuifanya huduma ya maktaba iendane zaidi na kasi ya mabadiliko ya teknolojia.

Mfumo huo unatarajiwa kurahisisha upatikanaji wa taarifa, kuhifadhi machapisho kwa njia ya kidijitali na kuongeza fursa kwa wananchi kupata maarifa bila kutegemea zaidi huduma za maktaba za kawaida.

Hatua hiyo pia inaipa Tanzania nafasi ya kuendelea kujenga mfumo wa kisasa wa kuhifadhi na kusambaza maarifa, sambamba na jitihada za serikali za kuunganisha mifumo na kuongeza matumizi ya teknolojia katika utoaji wa huduma kwa wananchi.

MOTO MKUBWA WATEKETEZA NYUMBA NA MADUKA KATIKA STANDI YA DALADALA TANAGA

 

NA REBECCA DUWE TANGA 

Moto mkubwa uliozuka majira ya saa 2:30 usiku wa kuamkia leo umeteketeza nyumba na maduka katika standi ya daladala iliyopo Barabara ya 12 jijini Tanga, na kusababisha wamiliki kukosa mahali pa kulala huku wakipoteza mali zao zote.

Akizungumza kwa masikitiko makubwa, mmoja wa waathirika wa janga hilo, Hamisi Abdalah, ameiomba Serikali kuwaangalia kwa jicho la huruma waathirika wa moto huo kutokana na kupoteza makazi na mali zao.

Abdalah alisema moto huo ulianza majira ya saa 2:00 usiku, baada ya moshi kuonekana katika chumba kimoja cha nyumba yake wakati akiwa amelala pamoja na mjukuu wake.

Alisema alifanikiwa kutoka nje ya nyumba hiyo akiwa na Mwanae  wa miaka 6, lakini hakufanikiwa kuchukua hata simu yake ya mkononi.

“Ombi langu kwa Mama Samia ni kwamba atusaidie ili tuweze kupata mavazi, malazi na mahitaji mengine, kwani kwa sasa tumekaa bila kuwa na chochote,” alisema Abdalah.

Kwa upande wake, mmiliki wa maduka mawili, Godias Kimath, alisema tukio hilo wamelipokea kwa masikitiko makubwa baada ya maduka yote mawili kuteketea na hakuna mali iliyoweza kuokolewa.

Kimath alisema wakati akipata taarifa kuhusu tukio hilo alikuwa akitoka mazoezini, ndipo akaambiwa kuwa kulikuwa na harufu ya moshi katika eneo hilo.

Alisema alipofika katika eneo la tukio, awali hakuweza kuona moto, lakini baadaye walilazimika kutafuta msaada kutoka kwa Jeshi la Zima Moto na Uokoaji.

“Jeshi la Zima Moto lilipofika, moto ulikuwa tayari umeshika kasi na kuteketeza mali zilizokuwemo ndani ya maduka,” alisema Kimath.

Aidha, Kimath alisema pamoja na kupata hasara kubwa, anamshukuru Mwenyezi Mungu kwa kumlinda na kumpa nguvu ya kuanza upya na kutafuta mali nyingine.

Moto huo umesababisha hasara kubwa kwa waathirika, huku chanzo cha moto huo kikiwa bado hakijafahamika.

WATUMISHI WA WIZARA WATEMBELEA OFISI ZA UBALOZI WA TANZANIA NCHINI INDIA

Watumishi wa Wizara ya Mambo ya Nje na Ushirikiano wa Afrika Mashariki wanaohudhuria mafunzo maalum ya diplomasia nchini India wametembelea Ofisi za Ubalozi wa Jamhuri ya Muungano wa Tanzania jijini New Delhi.

Katika ziara hiyo, watumishi hao walikutana na wafanyakazi wa Ubalozi na kupata fursa ya kuzungumza na Balozi wa Tanzania nchini India, Mheshimiwa Anisa Mbega, pamoja na watumishi wengine wa Ubalozi.

Akizungumza wakati wa kuwakaribisha watumishi hao Ubalozini, Mheshimiwa Balozi Anisa Mbega alisema Ubalozi umefurahi kuwapokea watumishi wenzao kutoka Wizara na kuwapongeza kwa kupata fursa ya kushiriki mafunzo hayo maalum ya diplomasia.

Balozi Mbega alisema ana imani kuwa mafunzo waliyoyapata yamewaongezea maarifa na hivyo yatachangia kuboresha utendaji wao wa kazi na hivyo kuleta tija na ufanisi kwa Wizara.

Aliishukuru Serikali ya India kwa kuitikia ombi la Wizara la kuwajengea watumishi uwezo ili waweze kutekeleza majukumu yao kwa tija na ufanisi na kuongeza kuwa Ubalozi utaendelea kushirikiana na Serikali ya India ili kuimarisha uhusiano kati ya Tanzania na India

Watumishi hao wa Wizara walikuwa nchini India kwa mafunzo maalum ya muda mfupi yaliyofadhiliwa na Serikali ya India na kutolewa na Chuo cha Sushma Swaraj (Sushma Swaraj Institute of Foreign Service - SSIFS), yakilenga kuwajengea uwezo watumishi wa Wizara katika maeneo ya diplomasia ya kisasa, masuala ya kimataifa na kikanda, historia, mabadiliko ya kidigitali,utamaduni na sera ya mambo ya nje ya India.

VIJANA WAHIMIZWA KULINDA NA KUDUMISHA AMANI

Na mwandishi wetu, Dar

Vijana wametakiwa kulinda amani na kujiepusha na vitendo vinavyoweza kusababisha machafuko au kuvunja sheria, msisitizo ukitolewa kuwa utulivu wa taifa ni msingi wa ustawi na maendeleo ya kiuchumi na kijamii.

Wakizungumza na waandishi wa habari leo Jumatatu Juni 29, 2026, Mkazi wa Dar es Salaam, Vin Alex, amesema Tanzania imeendelea kujulikana kama nchi yenye amani kwa muda mrefu, hivyo kila mwananchi ana wajibu wa kushirikiana na serikali kuhakikisha hali hiyo inadumu.

"Tanzania yetu ni ya amani. Tusishiriki kwenye machafuko au matukio ya uvunjifu wa amani nchini. Serikali pia ijizatiti kuhakikisha amani inaendelea kuwepo kwa kudhibiti wavunjifu wa sheria. Sisi wananchi tupo tayari kuungana na serikali katika kulinda amani,"amesema.

Ameongeza kuwa vijana wanapaswa kuwa waangalifu dhidi ya ushawishi wowote unaoweza kuwafanya wajihusishe na vitendo visivyokubalika kisheria, akisisitiza kuwa jukumu la kulinda amani linawahusu Watanzania wote.

Kwa upande wake, Boniface Makomba, ambaye ni mlemavu na mkazi wa Dar es Salaam, amesema maandamano au machafuko yanaweza kuathiri shughuli za uzalishaji, biashara na utoaji wa huduma, hali inayoweza kudhoofisha uchumi na kuchelewesha maendeleo.

"Tusiingie kwenye mikumbo vijana. Maandamano yatavuruga amani na kudhoofisha uchumi na maendeleo yetu," amesema.

Kauli za wananchi hao zinakuja wakati ambapo Watanzania wengi bado wanakumbuka matukio yaliyotokea wakati wa Uchaguzi Mkuu wa Oktoba 29, 2025, ambapo maeneo mbalimbali nchini yalishuhudia vurugu na uharibifu wa miundombinu. Matukio hayo pia yalihusishwa na vifo vya watu, pamoja na uharibifu wa miundombinu mbalimbali.

Wananchi hao wamehimiza kila Mtanzania, hususan vijana, kuendelea kutanguliza mazungumzo, kuheshimu sheria za nchi na kushiriki katika shughuli za maendeleo kwa njia za amani ili kuendeleza utulivu na mshikamano wa taifa.

TRA YAPANDA MITI 1000 KATIKA SHULE UMMY MWALIMU KUADHIMISHA MIAKA 30 YA KUANZISHWA KWAKE

 

NA REBECA DUWE TANGA 

Katika kuendeleza shughuli za uwajibikaji kwa jamii, Mamlaka ya Mapato Tanzania (TRA) leo imepanda miti isiyopungua 1,000 katika Shule ya Sekondari Ummy Mwalimu iliyopo Kata ya Maweni, ikiwa ni sehemu ya maadhimisho ya miaka 30 tangu kuanzishwa kwa mamlaka hiyo.

Akizungumza wakati wa zoezi hilo, mgeni rasmi ambaye ni Naibu Kamishna wa Shughuli za Ufundi – Kodi za Ndani, Ted Frank Silkiluwasha, alisema pamoja na jukumu la kukusanya mapato ya Serikali, TRA imeendelea kushiriki shughuli mbalimbali za kijamii zinazoleta maendeleo kwa wananchi.

Alisema zoezi la upandaji miti linaonesha ushirikiano mzuri uliopo kati ya TRA na jamii, huku akisisitiza umuhimu wa kuitunza miti hiyo ili iweze kukua na kutoa manufaa kwa vizazi vya sasa na vijavyo.

"Utunzaji wa miti ni muhimu kwa sababu huchangia kulinda tabaka la ozone, kupunguza athari za mabadiliko ya tabianchi na kulinda afya ya binadamu pamoja na viumbe wengine," alisema Silkiluwasha.

Aidha, alimtaka Meneja wa TRA Mkoa wa Tanga kuendelea kutoa elimu ya kodi kwa wananchi, akieleza kuwa elimu hiyo inapaswa kuwa endelevu. Pia alipendekeza Shule ya Sekondari Ummy Mwalimu kuingizwa katika mpango wa Tax Club, unaolenga kuwajengea wanafunzi uelewa na utamaduni wa kulipa kodi.

"Ukubwa wa taifa haupimwi kwa wingi wa watu au silaha, bali kwa uchumi imara. Uchumi huo hujengwa kupitia ukusanyaji wa mapato ya Serikali ambayo huwezesha kuboresha sekta za elimu, afya, miundombinu na hata kuimarisha ulinzi na usalama," alisema.

Kwa upande wake, Meneja wa TRA Mkoa wa Tanga, Castrol John, aliwataka wafanyabiashara kuzingatia sheria za kodi na kuacha kutumia njia zisizo halali wanapoingiza bidhaa nchini.

Pia alihimiza wananchi kuwafichua wakwepa kodi, akibainisha kuwa TRA ina utaratibu wa kutoa zawadi kwa watu watakaotoa taarifa zitakazosaidia kuokoa mapato ya Serikali yanayopotea.

Naye Mhifadhi kutoka Wakala wa Huduma za Misitu Tanzania (TFS), Michael Charles, aliipongeza TRA kwa hatua hiyo na kuzitaka taasisi nyingine kuiga mfano huo.

Alisema miti ina mchango mkubwa katika kuhifadhi mazingira, kuboresha ubora wa hewa, kuhifadhi viumbe hai, kuongeza vivutio vya utalii, kutoa matunda na kuchangia afya bora ya jamii.

Akitoa shukrani kwa TRA, Mkuu wa Shule ya Sekondari Ummy Mwalimu, Asha Kitundu, alisema shule hiyo ina eneo la takribani ekari 700, hivyo miti iliyopandwa itasaidia kutoa kivuli, kuzuia mmomonyoko wa udongo na kuboresha mazingira ya kujifunzia.

Aidha, aliwahamasisha wadau wengine kujitokeza kuisaidia shule hiyo, akieleza kuwa bado ni changa na inahitaji ushirikiano wa jamii katika kuendeleza maendeleo yake.

Shule ya Sekondari Ummy Mwalimu ilianzishwa mwaka 2022 ikiwa na wanafunzi 316 waliohamishwa kutoka Shule ya Sekondari Maweni. Kwa sasa shule hiyo ina wanafunzi 916 na walimu watatu, huku ikitarajia kupokea wanafunzi 83 wa Kidato cha Tano mwezi Julai mwaka huu.

ZAIDI YA WANUFAIKA 17,000 WA KAYA MASKINI RUVUMA WAFIKIWA NA BIMA YA AFYA KWA WOTE.

Meneja wa mfuko wa bima ya Afya Mkoa wa Ruvuma Hansi John Akizungumza na waandishi wa habari waliomtembelea ofisini kwake kuhusu mipango ya serikali kuzifikia kaya zisizo na uwezo na utekelezaji wake kwa awamu kupitia mpango wa TASAF. 

Na Regina Ndumbaro Songea-Ruvuma 

Mfuko wa Bima ya Afya Mkoa wa Ruvuma umefanikiwa kuwafikia zaidi ya wanufaika 17,000 kutoka kaya zisizo na uwezo katika utekelezaji wa awamu ya kwanza ya mpango wa Bima ya Afya kwa Wote unaotekelezwa na Serikali kupitia mpango wa TASAF. 

WADAU KILOLO WAJADILI FURSA ZA KUIMARISHA UCHUMI KUPITIA MRADI WA INUA II

 Hand in Hand Eastern Africa–Tanzania imekutana na viongozi na wadau wa Wilaya ya Kilolo kwa lengo la kujadili fursa za ushirikiano katika utekelezaji wa Mradi wa INUA II, unaolenga kuwawezesha wanawake, vijana na makundi yaliyo katika mazingira ya uhitaji kujenga uchumi endelevu.

Wilaya ya Kilolo ni miongoni mwa maeneo yenye fursa kubwa katika minyororo ya thamani ya kilimo cha bustani (horticulture) na ufugaji wa maziwa. Pamoja na uwepo wa rasilimali na fursa hizo, bado jamii nyingi zinakabiliwa na changamoto za ukosefu wa ujuzi, maarifa na mbinu bora za uzalishaji, uchakataji na kuongeza thamani ya mazao pamoja na bidhaa zinazotokana na shughuli hizo.

Katika kikao hicho, wadau walisisitiza umuhimu wa kuimarisha ushirikiano kati ya Serikali, jamii na wadau wa maendeleo ili kujenga uwezo wa wananchi kutumia kikamilifu fursa zilizopo, kuongeza kipato na kuboresha ustawi wa maisha yao.

Kupitia Mradi wa INUA II, Hand in Hand Eastern Africa–Tanzania itaendelea kushirikiana na mamlaka za serikali za mitaa pamoja na wadau mbalimbali katika kutoa maarifa, ujuzi na msaada unaohitajika kwa wananchi, kwa lengo la kukuza shughuli za kiuchumi, kuongeza ajira na kuchochea maendeleo jumuishi na endelevu katika Wilaya ya Kilolo.