Mchakato wa Kumpata Mrembo wa Mkoa Kagera umekwisha anza na Sasa unaendelea katika hatua za kuwapata wawakilishi kutoka Wilaya zinazounda Mkoa huo, ambapo Shughuli hiyo imeanzia Biharamulo.
Tayari washiriki wapatao 12 wameanza kambi Rasmi ya kujifua kuwania Nafasi ya Mrembo wa Biharamulo, huku joto likiwa kubwa kutokana na namna ushindani unavyokuwa katika kinyanganyiro hicho kwani Washiriki wote wanaonekana kuwa na vigezo muhimu, wanaendelea na mazoezi katika Hoteli ya Green Park nje kidogo ya Mji.
Mara hii wenye dhamana ya kuendesha Shindano Hilo kwa Mkoa wa Kagera ni Zachwa Investment kupitia Redio yao ya Kasibante FM, ambapo wanashirikiana na Serengeti Breweries Ltd, huku ikitarajiwa zawadi ya Gari kwa Mshindi wa Taji hilo la Miss Kagera.
Shindano la Miss Biharamulo litafanyika Siku ya Ijumaa Mei 28, 2021 katika Ukumbi wa Rest House kuanzia saa 12 Jioni na kuendelea ambapo burudani hiyo itasindikizwa na Wasanii Chege na Isha Mashauzi, huku Mbunge wa Jimbo la Biharamulo Mhandisi Ezra Chiwelesa akiwa na mchango mkubwa katika Shindano hilo.
Pamoja na Waandaaji hao pia wapo Wadau ambao wamejitokeza kuunga Mkono onesho hilo, wakiwemo Fiza Stationery, PIMA General Enterprise, Nyamahanga Green Park, Ofisi ya Mbunge Biharamulo, Rest House na wengine.
