Kufuatia sakata lake la kudaiwa kufanya utovu wa nudhamu dhidi ya kocha Nasreddine Nabi, nahodha wa kikosi cha Yanga Lamine Moro ameibuka na kufungukia kuwa hausiki na tuhuma hizo.
Lamine wiki iliyopita aliondolewa kikosini kwenye kambi ya Yanga iliyokuwa ikijiandaa na mchezo wa Ligi Kuu Bara dhidi ya Namungo, kutokana na madai ya utovu wa nidhamu.
Akizungumzia kuhusu sakata hilo, Lamine amesema: "Mimi si mtovu wa nidhamu kama inavyoelezwa, kabla hatujasafiri kwenda Mtwara nilipata majeraja ambayo benchi la ufundi walilifahamu.
"Kocha aliuliza madaktari kwa nini sifanyi mazoezi, akaambiwa kuhusu majeraha yangu, lakini alisisitiza kwamba nilitakiwa kufanya mazoezi, nikamweleza kuhusu hali yangu lakini alionyesha kutoniamini, kiasi cha kupimwa kwa mara nyingine na ikathibitika kuwa nina majeraha, lakini baadaye nilirudishwa Dar."
