Waliomburuza Jamaa Kwenye Bodaboda Mpaka Kumuua Wakamatwa

JESHI la Polisi mkoa wa Tanga linawashikilia watu 11 kwa tuhuma za kumshambulia na kumuua mtu mmoja aliyetuhumiwa kuiba pikipiki huko Korogwe.

 

Akizungumzia tukio hilo, Kamanda wa Polisi Mkoa wa Tanga amesema marehemu alituhumiwa kuiba pikipiki Korogwe Tanga, Julai 27, mwaka huu na kutokomea nayo kusikojulikana.

 

Baada ya kufanya tukio hilo, Madereva bodaboda wa eneo aliloiba pikipiki hiyo wakaanza kumsaka ambapo baada ya siku chache walimkamata akiwa na pikipiki hiyo.

 

"Baada ya kumkamata walianza kumshambulia kwa vipigo kisha kumfunga kamba kwenye pikipiki na kuanza kumburuza barabarani (barabara ya vumbi). Hata hivyo, kutokana na majeraha makubwa aliyoyapa, mtu huyo alifariki dunia.

 

"Mpaka sasa tumewakamata watu 11 kwa kwa ajili ya uchunguzi na kuhusika na tukio hilo la kinyama. Uchuguzi ukikamilika tutawafikisha mahakamani," amesema Chatanda.

 

Aidha, RPC Chatanda amewataka wananchi kutojichukulia hatua za kisheria mikononi kwani ni kuvunja sheria, hivyo iwapo kuna uhalifu basi waripoti katika vyombo vya sheria.

KATIBU MKUU CCM ATOA SIKU 14 KWA VIONGOZI WA WILAYA NA MIKOA KUKAGUA UTEKELEZAJI WA ILANI YA CCM

 Katibu Mkuu wa Chama Cha Mapinduzi (CCM) Daniel Chongolo ameagiza viongozi wa chama hasa kupitia Kamati za Siasa katika ngazi za wilaya na mikoa ndani ya siku 14 wakamilishe kukagua miradi yote ya maendeleo ambayo ni utekelezaji wa Ilani ya Uchaguzi ya CCM ya mwaka 2020-2025 katika maeneo yao na taarifa ya kilichojiri iwasilishwe ofisini kwake.

Sambamba na maagizo ya kuwataka kukagua miradi ya maendeleo, Chongolo pia amewaagiza kuwasilisha taarifa kuhusu utekelezaji wa ilani na amesisitiza kuwa chama kitafuatilia utekelezaji wa maagizo hayo.

Chongolo ametoa maagizo hayo tarehe 10 Agosti, 2021 mkoani Morogoro wakati akikagua mradi wa ujenzi wa reli ya kisasa  (SGR), akiwa ameambatana na Wajumbe wa Sekreterieti ya Chama Taifa.

"Niwapongeze watu wa Morogoro kwani mmeweza kuonesha njia nami nimeamka nije hapa na sekretarieti yangu kujionea kama kinachofanyika hapa ni kile kilichoelekezwa katika ilani yetu ya uchaguzi na ndicho kinachoelezwa kila mara,"amesema Chongolo na kuongeza "Haya ni maagizo na maelekezo Kama tulivyopeana mara baada ya mkutano mkuu maalum kuwa wote tushuke chini kukagua miradi ya maendeleo katika maeneo yetu ."

Amesema wao wanawajibu wa  kuisimamia Serikali na utekelezaji wa Ilani kwani ni sisi ndio tutakaorudi kuwaeleza wananchi nini tumefanya.

Kwa upande wake Mkurungezi Mkuu wa Shirika la Reli nchini (TRC) Masanja Kadogosa amesema anaishikuru Serikali kwa kuwapatia fedha kwa wakati kwa ajili ya kukamilisha mradi huo huku akifafanua mpaka sasa wamelipa  hati 34 kati ya 35 huku hiyo moja ambayo inalipwa muda wowote kuanzia sasa.

RC Tabora ahimiz uwekezaji katika ufugaji nyuki

WAKAZI wa Mkoa wa Tabora wamehimizwa kuwekeza katika ufugaji wa kisasa wa nyuki kwa ajili ya kuongeza uzalishaji wa asali

Kauli hiyo imetolewa leo na Mkuu wa Mkoa wa Tabora Balozi Dkt. Batilda Buriani wakati alikuwa akizindua Mabaraza ya Biashara ya Wilaya ya Kaliua na Urambo.

Asali ni mojawao wa bidhaa ambayo inaweza kuwaondoa wakazi katika umaskini na kuendelea kuutangaza Mkoa wa Tabora ndani na nje ya Nchi .

Balozi Dkt. Batilda alisema hivi sasa ufugaji wa nyuki katika Mkoa wa Tabora bado unatumia mizinga ya asili ambayo uzalishaji wake wa asali ni kidogo ambapo ni wa wastani wa kilo 9 kwa kila mzinga.

Alisema wakazi wa Tabora wakikubali kubadili teknolojia ya kizamamani na kutumia mizinga ya kisasa watapata wastani kilo 20 hadi 25 kwa mzinga mmoja.

Balozi Dkt. Batilda alisema hivi Mkoa huo unawastani wa mizinga laki nne ambapo kati ya hiyo 40,000 ndiyo ya kisasa.

Alisema Mkoa wa Tabora unatakiwa kutumia fursa iliyopo ya miti ya miombo kuongeza idadi ya mizinga ya kisasa kwa ajili ya kuongeza uzalishaji wa asali.

Balozi Dkt. Batilda alisema tayari uongozi wa Mkoa umeshafanya juhudi ya kukutana na TAWA ili kuomba kibali cha kuwaruhusu wafugaji wa nyuki kutumia mapori yao

Katika nyingine Mkuu wa Mkoa wa Tabora Balozi Dkt. Batilda amewataka wakulima kuendesha kilimo ambacho ni rafiki wa mazingira na uoto wa asili.

Alisema hatua itawezesha nyuki kuendelea kuwa na malighafi ambazo zinatumiwa katika utengenezaji wa asali.

Balozi Dkt. Batilda aliongeza kuwa sanjari na hilo ni vema Kila Halmashauri Mkoa huo ikaanzia zoezi la kuwa na mistu yake na elimu hiyo waipeleke hadi ngazi za familia.

 

Zifahamu faida za kula Strawberry

 

Kula matunda ni faida kubwa katika maisha yetu, na matunda yako mengi. Leo nakudokeza kidogo tu tunda moja linalojulikana kwa jina la 'strawberry' 

Tunda la Strawberry lina umuhimu na faida nyingi sana katika mwili wa binadamu. Miongoni mwao ni faida za kiafy kama vile;-

1. Kuimarisha mifupa

2. Husaidia nguvu za kiume na muamko wa kufanya mapenzi. Hii ni kwa kuwa zina madini ya zink basi husaidia katika mfumo wa uzazi wa mwanaume.

3. Husaidia kuponya majeraha kwa haraka

4. Hutunza ngozi ya mwili

5. Kupunguza madhara yatokanayo na presha ya kupanda na kushuka

6. Kwa wenye uzito mkubwa husaidia kupunguza uzito

7. Kuongeza kumbukumbu

8. Huzuia kuzaliana kwa bakteria na virus mwilini

Lakini pia Strawbery ina matumizi tofauti ikiwemo

1. Kuliwa kama matunda mengine

2. Kutia ladha katika vyakula mbali mbali

3. Kutengeneza marashi

4. Kutia nakshi katika baadhi ya vipodozi

POLISI WAMKAMATA YULE MHUNI "TELEZA' ANAYEDAIWA KUBAKA NA KUCHUKUA CHUPI ZA WANAWAKE ARUSHA

Kamanda wa Polisi Mkoa Arusha ACP Justine Masejo

Na Malunde 1 blog - Arusha

Hatimaye Jeshi la Polisi limekiri kukamatwa kwa mtuhumiwa anayedaiwa kuingia katika nyumba za watu katika eneo la Murieti na kuwabaka wasichana kisha kuondoka na nguo za ndani.

Kwa mujibu Mwenyekiti wa mtaa Murieti Dominick Kivuyi amesema kijana huyo Mnene mweupe alikamatwa akiwa na mafuta ambayo hutumia kujipaka asikamatwe, kifimbo chenye ushanga na alikamatwa akiwa uchi katika eneo la balozi Nuru pia akiwa na bisibisi ambayo huwachoma wanawake baada ya kuwabaka na kuondoka na nguo zao za ndani.

Mara baada ya taarifa za kukamatwa kwa 'teleza' huyo, leo asubuhi mamia ya Wakazi wa Kata ya Murieti waliofurika kituo cha polisi Murieti wakitaka kumuona mtuhumiwa huyo anayedaiwa kuwafanyia ukatili wanawake.

Kamanda wa Polisi Mkoa Arusha ACP Justine Masejo, amesema mtuhumiwa huyo amekamatwa leo Jumatano, Agosti 10, 2021 saa tisa usiku baada ya msako mkali uliofanyika katika eneo la Murieti na Kwa Mrombo jijini Arusha.

Kamanda wa Polisi Mkoa wa Arusha amesema kuwa mnamo tarehe 07/08/2021 muda wa saa 06:05 Mchana maeneo ya Morombo jiji la Arusha ulifanyika mkutano wa ulinzi shirikishi na usalama katika eneo la Muriet ambalo lilihusisha wananchi na vikundi vya ulinzi shirikishi pamoja na wawakilishi wa Wilaya ya Kipolisi Muriet,

"Katika kikao hicho kulijitokeza taarifa za kuwepo mtu mmoja asiyefahamika na anayeingia katika nyumba zao nyakati za usiku na mara baada ya kuingia hutokea dirishani ambapo hizo taarifa hizo hazikuwahi kuripotiwa Jeshi la Polisi Mkoa wa Arusha mpaka zilipotolewa katika kikao hicho cha ulinzi shirikishi",amesema.

Amesema baada ya kupata taarifa hizo Jeshi la Polisi Mkoani Arusha lilianza uchunguzi wa kina kwa kushirikiana na vikundi vya ulinzi shirikishi na timu ya makachero kuhusiana na taarifa hizo ambapo siku ya leo tarehe 10.08.2021 muda wa saa 09:00 alfajiri Jeshi la Polisi lilifanikiwa kumkamata mtu mmoja jina limehifadhiwa huko maeneo ya kwa Morombo akiwa katika mazingira ya kutatanisha.

Kamanda Masejo amesema kuwa Jeshi la Polisi Mkoani Arusha linaendelea na uchunguzi wa taarifa hiyo ambayo ilitolewa katika kikao hicho kilichofanyika siku ya Jumamosi.

ACP Masejo ametoa wito kwa wananchi kutoa taarifa za uhalifu na wahalifu ili kukomesha uhalifu, Pia ametoawito kwa waandishi wa habari kuhakikisha wanatoa taarifa ambazo zimedhibitishwa na jeshi la Polisi ili kutokuleta taharuki kwa jamii na Mkoa mzima kwa ujuml

Corona; Wananchi wanavyoishi kwenye ‘mstari’ wa kifo Dar

UNAPOINGIA katika eneo la kusubiria feri eneo la Kigamboni Feri Dar es Salaam utasikia ujumbe kwenye spika takribani nne zilizopo hapo ikiwa ni kukukumbusha kuhusu tahadhari ya ugonjwa wa corona.

Ujumbe unaosikika kwenye spika hizo ndogo ni kutoka kwa Mkuu wa Mkoa, Amos Makalla ambao unasisistiza tena kwa sauti kali ikisema kuwa: "Narudia tena sasa sio hiari kwa mtu anayeingia kwenye gari, kivuko, kwenye mwendokasi kuvaa barakoa sio hiari tena, ni moja ya sharti," inasikika sauti hiyo.

Sauti hiyo ya Makalla ambayo ailiitoa Agosti 2, mwaka huu inaendelea kuhimiza kuwa: "Nimefanya uchunguzi, unaenda kwenye kivuko feri mtu anaingia na barakoa kwa sababu tu kuna usimamizi, akifika ndani anaivua na anapotaka kutoka anaivaa, unapovaa barakoa unajikinga wewe na mwenzako.

"Niwatake wasimamizi watu wote wanaohusika na vyombo vya usafiri kuwe na abiria waliokaa tu, unavaa barakoa kwa usalama wako sio wa kuniridhisha mimi Mkuu wa mkoa, kinga ni bora kuliko tiba," anasisitiza Makalla kwenye tangazo hilo.

Wakati ujumbe huo ukiendelea kupenya taratibu kwenye masikio ya abiria wanaokatiza huku na kule kwa ajili ya kuwahi kupata nafasi kwenye panton; askari wa getini naye anapigilia msumari kwenye jambo hilo hilo.

"…Nyie…wewe vaa barakoa kuna hatari huko, unaingia kwenye hatari. Wewe mama vaa barakoa usituletee balaa," anasikika Askari huyo huku wengi wakimpa kisogo kwa kudhani kuwa wanamkomoa.

Hiyo ndiyo picha ya haraka kwenye eneo hilo linalotumika na abiria kusubiria kivuko mara baada ya kukata tiketi.

Kwenye pantoni nako hali siyo shwari, kwani wananchi wengi wanaokatiza huku na kule wanavua barakoa mara tu baada ya kuwa wamekanyaga mguu wao kwenye kivuko hicho cha Kigamboni.

Wafanya biashara wa pipi na karanga ndani ya vivuko hivyo ni miongoni mwa makundi machache ambayo yameamua kuchagua fedha dhidi ya kifo. Kwani hakuna tahadhari zozote wanazochukua.

Kwani wakati kivuko cha MV Magogoni kikiendelea kukata mawimbi kwa ajili ya kusaka upande wa pili wa Dar es Salaam (Kigamboni) nao wanakisindikiza kwa miruzi na sauti nzuri za kuita wajeta.

"…pata pipi hapa…, kamata big G hii kwa afya yako …kinywa kitanuka usipochangamsha meno…," wanasikika vijana hao ambao wengine kwa muonekano wao walipaswa kuwa shule.

Kumbuka kuwa wakati wa zoezi lote hili la ufanyaji biashara ya pipi na karanga hakuna hata mmoja aliyevaa barakoa licha ya kupokea fedha kutoka kwenye mikono ya watu mbalimbali ambao nyendo zao za usalama hazijulikani.

Abiria nao kwa maana ya waliosimama chini na juu ya kivuko nao hawana habari juu ya usalama wao kwani wako "bize" kuangalia madhari nzuri ya Dar es Salaam na mawimbi ya maji yanavyopanda na kushuka.

Ukiwa ndani ya kivuko hicho utaona wengine wakiendelea kuchokonoa vipande vya nyama vilivyokwama kwenye meno kwa kutumia vijiti vyao, sasa ujiulize anafanya hivyo akiwa amevaa barakoa au la.

Wanafunzi nao wakati wakirejea nyumbani kutoka katika shule zilizoko katikati ya Jiji wanaendelea kufukuzana huku na kule ndani ya kivuko hicho cha magogoni huku wakicheka kwa furaha.

Jambo la kusikitisha ni kwamba hakuna hata mmoja anayeshtuka kuwakumbusha juu ya usalama wao kwa kujikinga kwa kuvaa barakoa.

Kwani licha ya wazazi ambao wanaonekana kama wangekuwa ni msaada kwa watoto hao, hakuna hata mmoja anayewakumbusha kuvaa barakoa ikiwamo kutulia na kutogusana na watu mbalimbali ambao hawajui nyendo zao.

Nashtuka kuona tukiwa upande wa pili wa kivuko nami nalazimika kushuka na kuendelea na maisha mengine lakini ukweli ni kwamba bado mkazo zaidi kwenye eneo hilo la kivuko ambalo hukutanisha watu wengi kwa wakati mmoja unahitajika.

Hiyo itasaidia kuokoa maisha ya walio wengi dhidi ya janga la corona. Kwani pamoja na kuwepo kwa ndoo wenye maji na sabuni kwa ajili ya kunawa kwa abiria wanaoingia kwenye kutumia kivuko hivho lakini hakuna mkazo wala ulazima wowote uliowekwa kuhakikisha kuwa kila mtu anasafisha mikono yake kwa sabuni na maji tiririka badala yake ni utashi wa mtu binafsi anapojihisi kuwa kuna haja ya kufanya hivyo.

Mkazo huo siyo tu kwamba utawafanya watu kuwa wasafi bali utaokoa maisha ya waliowengi wakiwamo watoto wa shule ambao ni kama wameachwa bila uangalizi.

Aidha, kama itazipendeza mamlaka husika za Mkoa wa Dar es Salaam basi zitilie mkazo kidokezo cha mkuu wa mkoa kupenya hadi ndani ya vivuko ili kuendelea kutoa elimu zaidi kwa wananchi.

Kwani kwa sasa  ni kama ujumbe huo ulipo unaingilia sikio la kushoto na kutokea lile la kulia, haijulikani ni nani wa kulaumiwa kwenye uzembe huo unaoendelea licha ya mkuu wa mkoa kuzihimiza mamlaka zinazohusika kusimamia hilo.

Mmoja wa Askari anayehudumu katika kivuko cha Mgogoni amabye hakutaka jina lake litajwe kwa kudai siyo msemji, anasema kuwa bado baadhi ya watu wanaotumia kivuko hicho wmeendelea kuchukulia pao uvaaji wa barakoa hatua ambayo inawaweka hatarini.

"Kila siku tunahangaika na watu hapa kaka, unakuta mtu mzima kabisa lakini hajavaa barakoa ukimuuliza anakwambia mimi ndiye nanjua afya yangu, sasa unadhani utafanyaje, wazazi nao wanashindwa kuwangalia Watoto wanao wakati wa kwenda na kurejea nyumbani kwni hawana barakoa Pamoja na kwamba wanaingia kwenye pantone ambalo linahusisha watu wengi tofautitofauti, naamini mamlaka zinaangalia hili na zitakuja na majibu lakini kwa upande wetu tunajitahidi kufanya sehemu yetu," anasema askari huyo.

Mtanzania Digital imefanya jitihada za kumtafuta Mkuu wa mkoa, Amos Makala kwa ajili ya kuzungumzia suala hilo bila mafanikio baada ya simu yake kutokupatikana.a

Hatua hiyo inakuja katika kipindi ambacho Serikali inaendelea kutoa chanjo kwa mamia na maelfu ya Watanzania waliolengwa kufikiwa na chanjo hiyo nchini.

Ummy Mwalimu ataka Wakurugenzi wa Halmashauri kushirikiana na Makatibu Tawala wasaidizi mikoa

Waziri wa Nchi, Ofisi ya Rais, Tawala za Mikoa na Serikali za Mitaa, Mhe. Ummy Mwalimu ameanza ziara ya kikazi leo mkoani Njombe ambapo pamoja na mambo mengine atakagua miradi ya maendeleo kwenye sekta ya afya ngazi ya msingi, sekta ya elimu na ujenzi wa miundombinu ya barabara.

Akizungumza leo Agosti 10,2021 na Sekretarieti ya Mkoa huo, Waziri Ummy ameupongeza uongozi na watendaji kwa kuendelea kwa kasi, ari na jitihada katika kutatua changamoto mbalimbali za kimaendeleo na kuongoza kwenye ukusanyaji wa mapato ya ndani kwa mwaka 2021/2022.

Amesema Sekretarieti za Mikoa zina wajibu wa kuhakikisha Halmashauri zote nchini zinatimiza majukumu yao kikamilifu kwa kuwa wananchi wanahitaji kupatiwa maendeleo na maendeleo yanapatikana kwa Halmashauri imara.

Katika ziara hiyo, Waziri Ummy amesisitiza umuhimu wa viongozi wa sekretarieti za Mikoa nchini kuhakikisha wanasimamia kwa weledi ukusanyaji na matumizi ya mapato ya ndani kwa kuwa ndio wasimamizi wakuu katika ngazi ya Halmashauri.

Aidha, amesema kuwa Makatibu Tawala wasaidizi wa Mikoa wana wajibu wa kuhakikisha wanachambua bajeti za halmashauri na kuangalia vipaumbele ambavyo vinasaidia katika kutatua kero za wananchi zikiwemo ununuzi wa madawati, ujenzi wa vyumba vya madarasa, ujenzi wa vituo vya afya na Hospitali za Wilaya na ujenzi wa miundombinu ya Barabara.

"Makatibu Tawala wasaidizi wa Mkoa wanawajibu wa kuhoji na kuchambua bajeti za Halmashauri kwa kina, kwa kuangala vipaumbele vitakavyosaidia kutatua kero za hasa katika masuala ya elimu, afya na miundombinu kwa ujumla. Ni kazi yenu kufanya kazi hiyo na sio ofisi ya Rais TAMISEMI, Ni wajibu wenu kusimamia matumizi ya Halmashauri kwa kuhakikisha fedha zinapelekwa katika kutatua kero za wananchi,"amesisitiza.

Katika hatua nyingine, Waziri Ummy amewaagiza Wakurugenzi wote nchini kuhakikisha wanatenga fedha za makusanyo ya mapato ya ndani kwa ajili ya utekelezaji wa miradi ya maendeleo inayotatua kero za wananchi.

Kabla ya kikao na Sekretarieti ya Mkoa, Waziri Ummy amekutana na Kamati ya Ulinzi na Usalama ya Mkoa na Wilaya na kukutana na wajumbe wa Halmashauri Kuu ya Chama cha Mapinduzi(CCM).

 

Tanzania Yasaini Mkataba Wa Uanzishwaji Wa Taasisi Ya Udhibiti Wa Dawa Ya Umoja Wa Afrika

 Tanzania imesaini Mkataba wa uanzishwaji wa Taasisi ya Udhibiti wa Dawa ya Umoja wa Afrika (African Medicines Agency) na kuwa Nchi ya 22 kusaini Mkataba huo unaohusisha Nchi Wanachama.
 
Akizungumza wakati wa hafla ya kusaini Mkataba huo katika Ofisi za Makao Makuu za Umoja wa Nchi huru za Afrika (AU) zilizopo Addis Ababa nchini Ethiopia, Waziri wa Mambo ya Nje na Ushirikiano wa Afrika Mashariki, Balozi Liberata Mulamula, amesema lengo la Tanzania kusaini mkataba huo ni kuunganisha nguvu na jitihada za pamoja na nchi nyingine za Afrilka katika kupambana na dawa bandia na duni.
 
Ameongeza kuwa Taasisi hiyo ya Udhibiti wa Dawa ya Umoja wa Afrika (African Medicines Agency) kwa kifupi AMA itasaidia katika kuunganisha jitihada za taratibu za kuwianisha (harmonization) mifumo ya udhibiti wa dawa katika Jumuiya za kiuchumi za kikanda Barani Afrika akitolea mfano chanjo mbalimbali ikiwemo ya UVIKO 19.
 
Nae Mkurugenzi Mkuu wa Mamlaka ya Dawa na Vifaa Tiba (TMDA), Bwana Adam Fimbo, amesema uwepo wa Taasisi ya AMA utawezesha kupatikana kwa soko la dawa nchini Tanzania kuendana na Mkataba wa Afrika wa maeneo huru ya kibiasahara pamoja na kuwezesha upatikanaji wa haraka wa dawa wakati wa dharura pamoja na majanga ambapo kwa sasa Tanzania ina takribani viwanda vipya 17 vya dawa vilivyopo katika hatua mbalimbali za ukamilishwaji.
 
Kwa upande wake Makamu Mwenyekiti wa Kamisheni ya Umoja wa Afrika, Dkt. Monica Nsanzabaganwa, amesema kuwa Taasisi ya AMA ni muhimu hasa katika kuweka mifumo imara ili kuwezesha nchi wanachama wa Umoja wa Afrika kutatua kwa pamoja changamoto mbalimbali zilizopo katika sekta ya afya.
 
Taasisi ya Udhibiti wa Dawa ya Umoja wa Afrika (AMA) inatarajiwa kuanza rasmi kufanya kazi mwaka 2022 baada ya kusainiwa na jumla ya nchi 27 za Umoja wa Afrika ambapo mpaka sasa nchi 22 zimesaini ikiwemo Tanzania ambayo ilipaswa kusaini mkataba huo tangu Februari 2020 lakini kutokana na janga la UVIKO 19 zoezi hilo liliahirishwa.

Aliyekuwa Msajili wa Hazina akabidhi ofisi rasmi

Msajili wa Hazina, Mgonya Benedicto (kulia) akipokea nyaraka kutoka kwa aliyekuwa Msajili wa Hazina,  Athumani Mbuttuka wakati wa makabidhiano rasmi ya ofisi yaliyofanyika jana katika Ofisi ya Msajili wa Hazina, Dar es Salaam. 

Benedicto ameteuliwa na Mheshimiwa Rais Samia Suluhu Hassan kuwa Msajili wa Hazina kuchukua nafasi ya Mbuttuka ambaye ameteuliwa na Mheshimiwa Rais kuwa Mkaguzi wa Ndani Mkuu wa Serikali.